Thursday, August 09, 2007

إسكندرية الصبية جنية امبارح


امبارح وامبارح وامبارح واسكندريه والسنه اللى فاتت والسنه
وأيام مكنت لسه داخله أولى إعدادى
ومسلسل زيزنيا ومسلسل ضمير أبله
البنات اللى في المدرسه وسيادة القبطان
وأنا لسه عيلة صغيرة بتحايل على بابا نروح إسكندريه ومكنش يرضى
ومعملهاش غير مرة واحدة ومكررهاش فبقيت بروح أى مكان في بحر
وأرجع وأنا بكره البحر اللى روحته أوى وأنا برضوا بعشق اسكندريه
مهو مش كل بحر يبقى بحر اسكندريه وأكيد مش الجانب البعيد هيكون
اليونان .........صوت فيروز في أول شريط أسمعه لها أيام مكنت في
إعدادى واللى أخدته من ابن خالتى وأنا مش عايزة أسمعه ومن بعدها
عشقت فيروز وعشقت اسكندرية وعشقت البحر
لما كان بشر عامر عبد الظاهر في زيزنيا بيحكيلي عن تفاصيل حبه
لاسكندريه من غير كلام كتير
لما كبرت من كام سنه فاتت وشوفت مسلسل أوبرا والبيت اللى بيتهز لما
الترام يعدى خلانى عشقت البيوت القديمه والروايح القديمه وخلانى برضوا
عشقت الترام والبيوت القديمه وبقيت نفسي أروح إسكندريه علشان أركبه
وبقيت بتمنى أكبربسرعه علشان كنت فاكرة الدنيا بمبي ولما هقول لبابا أنا
هسافر أعيش لوحدى هيوافق ياااااااااااااااه ده أنا طلعت بحب
اسكندريه من زمان قوى

المرة دى كنت عارفه إنى هكون لوحدى هو أنا مزعلتش خصوصاً لما كنت
السنه اللى فاتت قعدت10أيام في اسكندريه من غير ما أشوفها صحيح كنت بكتفي
بالبحر بس فينها اسكندريه ،السنه دى كان المفروض هقضي أربع أيام بس لكن
كنت عايزة ألف فيهم اسكندريه كلها ولو عرفت أخد أي سفينه ع اليونان مكنتش
هتراجع ، الحلو إنى هناك اتجمعت مع ياسمين صاحبتي وخرجنا كتير وف كل حتة
كان نفسي أروحها عملنا حاجات جميله وشوفنا حاجات حلوة أوى والفيلم اللى كان
كله نجوم ومطر أقولك حاجه يا ياسمين الراجل العجوز اللى كان
في الفيلم ساعة المطرة لما دخل يتخبى تحت الجدار وولع السيجارة فكرنى بالراجل
العجوز اللى كان بيقعد لوحده ومعدتش بشوفه،استمتعت بكل لحظة قضيتها برة المعسكر
معاكى ،لما كنت برجع المعسكر بالليل كنا بنخرج مع المشرفات نقعدعلى البحر على
الصخور لحد بعد نص الليل كنت بحس بالشتا ، البت ميري وإحنا راجعين لما كانت
بتضحك وكل ضحكتها جمال وتعليقاتها وإيفهاتها على أي حاجه بتحصل لما كنت بفرد
ضهرىعلى السرير وأقولهم تصباحوا على خير وتفضل عيونى مفتحه ومش عارفه أنام
فأضطرآخد المنوم علشان أعرف أنام فإنجى تتخض علي وتتحايل إنى أبطل الهباب ده
فأضحك وأخده وأنام ، في آخر يوم لما أمانى بتقولى إنها عمرها ما انبسطت إنها
عرفت حد قد ماانبسطت من ده دلوقتى ، كانت بتقول عليّ غريبه فكنت أضحك فأرجع
وأفتكر فاتن حمامه في المسلسل وفجأة يسمعوا صوت مزيكا مرسيل خليفه فيسكتوا كلهم
من غير ميكونوا عارفينه ويزيدإيمانهم إنى غريبه فأضحك لأنهم جمال أوى زى جمال البحر
كنت الأيام دى هاديه أوى وصافيه أوى لما روحنا القلعه في عزالحر أخدت جمب
عند السور ورا وقعدت زى ما اتفقت مع ميري على متفرج البنات على القلعه ويجولي
علشان نرجع سوا فضلت طول الوقت أصور نفسي وأصور البحر ، صحيح الابتسامه
كانت هي هي لكن كنت حاسه رغم إنى ببتسم بس علشان الصور تطلع حلوة بس
كنت مرتاحه



كنت كل ممشي في مكان عايزة أسيب فيه ذكرى وأخليه يسيب ريحته جوايا
فكنت بصور كل حاجه يمكن في صور كتير شبه بعضها بس الملامح بتتغير
لما كنت برتب شنطتى كنت عماله أفتكر كل دقيقه مرت عليّ، البنت موها

للمكان جواكى والناس بعد كده ، الأماكن كلها سابت جوايا روايح جميله

بالذات الصخرة اللى كنت بقعد عليها كنت نفسي كمان أعرف أنزل لآخر صخرة بتطل
عليها الموجه بس كان صعب مكنتش هعرف أو كنت خايفه لأن الوقت كان غامق أوي
أول يوم عرفت ولد عنده عشر سنين بيبيع اللب اشتريت منه مع إنى مبحبش اللب الأسمر
وفضلت أتكلم معاه فوق النص ساعه وفضل يحكيلي عن اخواته وبلدهم وانه من أسيوط
وبيجى يشتغل هنا بيقول إن أخته هى اللى شايله البيت علشان كده معلومهاش لما لاقوها
شاطرة في شغل البيت ، البنت اللى هتتجوز على آخرالصيف وأبوه نادر يعملها فرحها
في الكنيسه الكبيرة اللى عندهم وهيدبح ويفرق ع الغلابه وأخوه اللى بيتمنى ياخد إعفى
من الجيش علشان يتجوز ويجى يعيش في اسكندريه ، الولد هو اللى ساعدنى أنزل
تحت عند الصخرة القريبه من الموج لأنى كنت خايفه أقع وأنا بنزل ، من ساعتها وأنا
لسه بعيد زى بعد اليونان كده ، أنا صورت ميرى وأميرة ونوجا ودينا وجميلة
وإنجى وهى مكسوفه و أمانى وهى بتضحك بجد من قلبها مش بس ابتسامه للصورة
صورت البحر وأنا جمبه بس بيبعد ، اتصورت في الترام وصورت البيوت القديمة
أنا عملت لنفسي زكريات حلوة جوة اسكندريه مع ناس كتير وأماكن كتير



20 comments:

عين ضيقة said...

هقولك ايه؟

ياريتنى كنت معاكى

شهر يناير said...

انتى اللى عنيكى حلوه شايف
بيها كل الأماكن والناس

شهر يناير said...

وانا نظرا لان سعر النت باهظ الثمن
ف ما قرتش البوست كله
واكيد هأقراه تانى
عشان جمصه العظيمه
وانتى فاهمه الباقى

كرانيش said...

مصورتيش العيال دى لييييييه
يخرب عقلك

دعونا نحقد فى صمت

...
بس خلاص معادش ينفع يا اسماء ماهى راحت واللى كان كان

عالعموم ملحوقه السنه الجايه نروح المعسكر الترفيها ابو خمسين جنيه
جاتنا نيله فى حظنا الهباب

كرانيش said...
This comment has been removed by the author.
كرانيش said...

اسكندريه الصبيه جنيه امبارح
بموت فى عودها السرح وفى رمشها السارح
اسكندريه عروسه البحر

اه

عروسه البحر

أحمد سلامــه said...

لما حد يعشق مكان معين
ومكان زي اسكندرية
وبالطريقة دي والوصف ده
يبقى حظه حلو قوي
مش بالمكان لا
المكان موجود للملايين
انا بقول يبقى حظو حلو على احساسة الجميل ده

عنتر بن غلبان said...

فكرتيني بأمل دنقل في مزامير لما بيقول:

أعشق اسكندرية
واسكندرية تعشق رائحة البحر
والبحر يعشق فاتنة في الضفاف البعيدة


وفكرتيني بصوت فيروز
وفكرتيني بناس كتير حلوة

ربنا يسامحك

وبجد بجد

بوركت

شغف said...

بت يا غادة
احنا مش قولنا نقوله : حاسب يا اسطا ، و على فرنسا ؟ انتي هاتاخدي طريق اليونان ؟

بالمناسبة
مش واخدة بالك من القطعة بتاعة أمل دنقل اللي صادق حاططها ؟ :-D
أقول بتفكرني بايه ؟ و لا بلاش ؟ :)

kholio said...

هاى غادة
عاملة ايه؟!
الحالة اللى بتتكلمى عنها فى البوست انا شخصيا مريت بيها قبل كده..
حلو اوى كلامك عن ايام زمان
-فكرتينى بالذى مضى-
الذكريات بقى والحاجات العنيفة دى

فكرتينى بسطر النهاية فى قصيدة ( دفتر وردة كورنيش ) لحبيبى / وائل (من غير القاب)
بيقول فيه:

أصعب مافى الامكان
مكان
لو يحضنك
يربطك بيه الزمان..

اما بالنسبة للصور بقى فَ شيئئ كويس انى الاقى حد ينافسنى ..
بس

21arestoo said...

انا بحقد عليكي

بس خلاص

الوردة السوداء said...

يعنى انا اقدر اقول ان يحى الفخرانى عمل معاكى واجب جامد اوى
وخلاكى تحبى اسكندرية اوى

فكرتينى بمسلسل ذئاب الجبل
وهوارة
هههههههههههه

يارتنى كنت فعلا معاكى

الوحدة بتقتلنى said...

هاى غادة او اسماء الله اعلم المهم كنت عاوز اقولك ان مدونتك جميلة
الاول انا مدون جديد موووت من الزقازيق وكنت عاوز اتواصل مع كل المدونين وبرضه اعرف شوية حاجات كدة ياريت تدخلى مدونتى وتقولى لصحابك واعرف رأيكوا

وربنا يوفقك

هيثم ابوعقرب said...

اسكندرية
..
...
....
.....
......
.......
........
.........
...........
............
.............
..............
.............
............
...........
..........
.........
........
.......
......
.....
....
...
..
.
-----------------------
=======================
بحبها قوي ونفسي اقضي فيها الشتا

شهر يناير said...

انا كنت فاهم غلط
اسكندريه ليه
البوست
بس

رانيا منصور said...
This comment has been removed by the author.
رانيا منصور said...

كنت مستطولة الوست ف الأول
بس تعرفي..

معرفش ليه حاجة ف كلامك وجعتني
يمكن عشان كانت هي بردو مرة وحيدة؟
أو احنا بنستغل اي فرصة
ولو كانت ذكريات الآخرين
عشان نستمتع بنعمة الوجع؟؟

ماعلينا
فيروز حلوة
والبوست حلو اوي كمان

4xmisr said...

تم افتتاح مدونالت 4xmisr
تعلم التدوين على بلوجر
http://spot-weblog.blogspot.com/
احترف التعامل مع الانترنت
http://4xpert.blogspot.com/
امتلك الانترنت مع أجلوكو
http://egloco.blogspot.com/
اكسب من الانترنت بدون رأسمال
http://arabtraders.blogspot.com/
تصفح الانترنت أكثر أمنا وسرعة
http://4xfirefox.blogspot.com/
نرجو التواصل معنا بتوجيهاتكم وأرائكم
شكرا

yasmina said...

غادة الكاميليا

مبسوطة قوي لذكرياتك الجميلة دي
اسكندرية فعلا جميلة قوي
وديما لما اروحها وابص على بيوتها القديمة افضل افتكر تاريخها القديم
واليونانيين والرومان لما كانو فيها
وكفايه بحرها لوحدو الي بيخليكي تعيشي جو تاني خصوصا بليل
احلى حاجه انك اخدتي الصور دي
والذكريات الحلوة
مبسوطة ليكي بجد

Sara Swidan said...

واضح اني ف نعمة مش حاسة بيها!!!