Monday, May 29, 2006

الوجود الكلاسيكي

مجرد وجودي حتى هذه اللحظه على قيد الحياه وامتلاكي لأشيائي الخاصه
تجعلني أمتلك إحساس بحب الحياه حباً كلاسيكيا على نغمات عذبه لفيروز
أو مقطوعات لبيتهوفن لذا فأنا أمتلك الكثير مما يجعلني أحب الحياه زي
(الحلم)
كان عندي زمان حلم كنت بحس إنه صعب يتحقق ودلوقتي بحس إنه مستحيل
لكن مجرد تفكيري في الحلم ده بيخليني مبسوطه لأبعد حدود.
لما أحيانا طبيعتي بتفرض عليّ أخرج غاده اللي جوه وأسيبها لوحدها شويه
وأبعد عنها علشان تاخد قرارها في أي حاجه تخصني لأنها غالبا بتكون صح
إيديه اللي بتمنى وأنا تعبانه وعندي سخونيه جامده هو بس اللي يعملي كمادات
ميه ساقعه..
ساعة لما النور يقطع أتسحب وأطلع جري آخر دور وأقعد على حرف البلكونه
وأفضل أعد النجوم وأبص على النخل اللي في الأرض اللي جمبنا
موسيقى زامفير أو أي موسيقى كلاسيك والدنيا ضلمه في نفس المشهد اللي فات
بشرط ميكونش في قمر موجود ساعتها
صورته المركونه على زجاجة البرفان ويفضل يبص علي وأنا بذاكر
الساعة 3.30الفجر
الشتاء وخصوصاً مع فيروز وكوباية عصير البرتقال المتلجه وخصوصاً ساعة
لما المطرة تكون جامده ونازله على الزرع الأخضر اللي في الغيطان اللي جمبنا
العشر شجرات بتوع الورد اللي في سور بيتنا ومفيش غير شجرة واحده بس اللي
بطلع وأخويه الصغير يقطع الورد بتاعها ,فأتخانق معاه وقوله حرام وأول مخرج
من الزرع يقطعهم
صوت بابا لما بيغني لأم كلثوم
لما بعمل ضفيرتين زي غاده وهي صغيرة وعنيه تكون صافيه وأحط راسي على
رجل ماما وأنام
القراءة في عز الإمتحانات وخصوصا لو طلع كتاب يستاهل
طبق الشوربه اللي محدش بيعرف يبدعه زيي والخلطه العجيبه اللي بعملها فيه
يعني من الآخر تاكل وتنسى
اللون الأبيض واللون الأخضرواللون الأزرق
البحر أقف قصاده بس منزلوش لأن على قد حبي ليه بخاف منه
الوحده احساس آخر يأتي من فكرة التوحد
عند توحد غاده التي تسكنني مع غاده اللي بين الناس وتتصالح كل منهما مع الأخرى
في هذه اللحظه فقط أحتاج إلى الوحده الحقيقيه وحده أشعر فيها بسعاده من نوع غريب
صوت الشيخ صلاح الجمل في رمضان ساعة الفجر ده غير رمضان له طله رائعه
ماجده الرومي ساعة المغربيه في الصيف
أحمد أخويا الصغير لما بيشوف فيلم جديد ويفضل يحكيه ويقلد كل الممثلين اللي فيه
ياااااااااااااااااااااااااااااااااااه
ده أنا طولت أوي بس في حاجه تانيه وأخيرة التدوين والمدونين والناس اللي مررولي
السؤال ده
ودلوقتي أنا مع فيروز ليالي الشمال ياحبيبي أنا عصفورة الساحه
أمرر السؤال ده لكل من
كراكيب
عوليس
يارا
درويش

18 comments:

شغف said...

حلوة قوي حكاية الوجود الكلاسيكي دي
انتي وصفتي الاحساس اللي الواحد بيحس بيه ومش قادر يديله مسمى

بس هوه نعتبر نفسنا - احم - معزومين عندك على شوربة وبعديها كوباية برتقال متلجة

اصلك كده جريتي ريقنا

وفكرتيني بحكاية القراية ايام الامتحانات - وان كان الواحد مفتقد اصلا الامتحانات وايامها-

حاجة اخيرة

بجد بجد يا بختك على كمية الورد والزرع والشجر والغيطان اللي جنب بيتكم
انا كده هاعزل واجي اسكن جمبكم

Ahmed Rashwan said...

غادة .. تفاصيلك مشعة جدا ، يعني شوفنا الأماكن وسمعنا معاكي الموسيقى وصوت بابا وأحمد أخوكي ، وكمنا شمينا رائحة الزرع والشوربة !!ا
افتكرت من سنين طويلة وأنا طفل صغير حينما كنت أخبأ القصص داخل كتب الدراسة:))!!ا

karakib said...

غاده انت جميله علي فكره
انا هجاوب علي السؤال ده ... بس عندي
هحكي الحلم اللي ممكن يخلي ناس كتير يقولو عليا مجنون و بيجيلي كل سنه و بسببه انا لسه عايش ... لو مجاليش السسنه دي مش عارف هاعمل ايه !!
انتوك

yara said...

لمستنى تفاصيلك اوى ياغادة وميرسى انك مهتمة تعرفى عنى
انت تأمر ياجميل

غادة الكاميليا said...

شغف هانم
يابنتي أنتي تأمري تعالي بس وأنا هروقك
بس بقول إيه بلاش قر على شوية الزرع وحياتك أصل لو راح خد قلبي وراح
مش هيبقى فيه وجود كلاسيكي ولا حتى بوب
films69
ميرسي ليك وعلى فكرة أحمد لسه مقلدلي النهارده محمد هنيدي في يا أنا يا خالتي
إلحاقيني يا نوئه أبويه عايز يجوزني
ربنا يخليك ليا يا أحمد وتضحكني على طول
أنتوك
صديقي العزيز والله أنت اللي جميل
بس مستنيه أشوف إجابتك وأوعي تنسى
يارا
الجميله جدا منورة البلوج يا قمر وميرسي على زوقك ومستنياكي تجاوبي بشف

Ahmed Rashwan said...

معقولة أحمد بيتفرج على الأفلام دي ؟؟
بس صحيح مفيش غيرها:((!!
أجمل تعليق سمعته عن " يا أنا ياخالتي "
من واحد صاحبنا قال -قاصدا هنيدي -
ولا أنت ولا خالتك !!ا

مأمون المغازي said...

الرائعة :
غادة الكاميليا
ما أجمل وأدق وصف الأحاسيس
ببراعة نقلتيني إلى جو المكان وسحر الطبيعة ورةعة الربط بينها وبين الإبداعات الكلاسيكية
ما أجمل البيوت جنب الغيطان وسط الشجر تحدها أشجار الرد
في الدفء العائلي
أوهجتي في الشوق أيتها الرقيقة العذبة
تحياتي

هوميروس said...

كمادات ميه ساقعة حلوة دي
ده تمرجي ولا ايه
وبعدين الشجر ده فعلا بيحسسنس ان الواحد لسه عايش في الدنيا مش في الكمبيوتر او الاسفلت
والنبي بقي كوباية شربة

كمنجاتي said...

كان عندي زمان حلم كنت بحس إنه صعب يتحقق ودلوقتي بحس إنه مستحيل
لكن مجرد تفكيري في الحلم ده بيخليني مبسوطه لأبعد حدود.
-----------------------------------
إيديه اللي بتمنى وأنا تعبانه وعندي سخونيه جامده هو بس اللي يعملي كمادات
ميه ساقعه..
-----------------------------------
صورته المركونه على زجاجة البرفان ويفضل يبص علي وأنا بذاكر
-----------------------------------
القراءة في عز الإمتحانات وخصوصا لو طلع كتاب يستاهل
-----------------------------------
طبق الشوربه اللي محدش بيعرف يبدعه زيي والخلطه العجيبه اللي بعملها فيه
يعني من الآخر تاكل وتنسى
-----------------------------------
اللون الأبيض واللون الأخضرواللون
الأزرق
-----------------------------------
البحر أقف قصاده بس منزلوش لأن على قد حبي ليه بخاف منه
-----------------------------------
أنا مش هاعلق إلا تعليق صغير
طبعا الفقره الأولى موضحه نفسها
رومانسيه جدااا
أما الفقره الثانيه بقى فهى موضحه نفسها قوى
طبعا دى تخاريف الحمى
أما الفقره الثالثه فهى صعبه شويه أو شويتين
لأن اللى بيبص على حد وهو بيذاكر معنى كدا إنه مش نافع وخصوصا إذا كان الشخص اللى بيتبص عليه حليوه
طبعا الفقره الرابعه فمش محتاجه تعليق لأنى أنا اللى هشيل الذنب فى الأخر علشان جبتلك القصه فى الأمتحانات
طبعا الفقره التاليه مش هقدر أعلق عليها إلا لما أدوق
الفقره اللى جايه بقى دى محببه لنفسى لأنى طبعا بحب اللون الأزرق
وأخيرا فأنا أعرف واحد كان زيك بيحب البحر وبيخاف منه بس هو راح وأتعلم العووم ومنسعتها خف خالص من حكاية الخوف من البحر

أوزوريس يتحدى ست said...

على فكره واضح إن موضوع حب الحياه دا منتشر هنا هى إه الحكايه ياجدعان
هى الحياه دفعتلوكوا كام؟
على العموم ربنا يخلى جمعه
ست

أوزوريس يتحدى ست said...

أنا مش هتكلم فى حاجه ماعرفهاش أنا بفهم فى الوجود الأستيل
وبعدين دا برهومه وكلاه البرومه
أوزوريس

هراءات منطقية said...

أجمل ما فى كتابات غادة عموما وفى البوست دة تحديدا هوة قدرتها على إشعارك إنك مش محتاج تشوفها عشان تعرف إنها إنسانة جميلة،يكفى إنك تقرالها عشان تحب تعيش تفاصيل العالم بتاعها....تحب تروح تقعد معاها فى البلكونة و تشرب معاها كوباية برتقال،تحب معاها البحر و اللون الأزرق،تحب تقعد مع أحمد و تسمع أبوها بيغنى أم كلثوم.....و فى الآخر تحب إنك تبقى قاعد من البوست للبوست مستنيها تكتب حاجة رقيقة زى اللى كاتباها المرة دى

sherif gharib said...

اجمل ما فى الحكلية التفاصيل خلتنى احس بيوم فى حياتى و كئنانا الى بحكية مش انتى الى قايلاة hope to visit my blog

Anonymous said...

ايه ده؟
هو انا ماجيتش هنا من امتى؟
انا قريت موضوعك كام مرة و فى كل مرة بانسى اعلق عليه
معلش يا غاده امتحانات بقى يا اختاه
ما علينا .. عذرا للرغى
بس انتى آثرتى فضولى بكلامك لمعرفتك الشخصية
بس خلاص
و السلام عليكم و رحمة الله و بركاته

غادة الكاميليا said...
This comment has been removed by a blog administrator.
غادة الكاميليا said...

films68
مخلاص كده هيشوفوا إيه تاني مفيش غير الحاجات دي بس ولا يهمك النهارده مقلدلي كريم عبد العزيز في أبو على
مأمون المغازي
ميرسي بجد على زوقك وكلامك ده المكان فعلا بحبه جدا ده غير الغروب فيه روعه
هوميروس
في اعتراض يعني حضرتك وبعدين بلاش طمع أنا عارفه هتموتوا على الشوربه
كمنجه
خير الكلام ماقل ودل وانت أوجزت فعلا
هههههههههههههههههههههه
بجد تعليقاتك دي بتعجبني أصلك بتقولي شويه حاجات لذيذه جدا زي الروايه كده اللي همتوت وأرجعهالك بس بعدك لحد مقرأها تاني وتالت ورابع
حكاية البحر دي انت متأكد منها ؟
الأخوة أوزوريس وست
منورين يا جماعه
النوبي
انت كمان جميل أوي والبلوج بتاعك جميل
ممكن تبقى تحط الأغنيه بتاعة أم المريله الكحلي أصلي نفسي أسمعها
إياكش تولع
صباح الخير يا دكتور
أولا ميرسي على كلامك الرقيق ده بجد انت شخصيه جميله جدا وزيارتي لبلوجك بقت عاده وعلى فكرة كلامك عني ده اللي مستهلش نصه تاج تاني عندي بس على راسي بجد ومن غير أي نفاق لأني مبعرفش انافق نهائي ولا أجامل بجد ميرسي
شريف غريب
ميرسي ليك ومنورني وزيارتي ليك حالا
انت تأمر يا شريف باشا
الست فنجان هانم
والله كل مدخل أشوف التعليقات الجديده بكون مستنياكي أخيرا ظهرتي منور يا جميل وقريب أوي هنعرف بعض ده انت معشش في القلب يا جميل
وعليكم السلام ورحمة اله وبركاته

21arestoo said...

ربنا يسامحك يا غادة
لون الكلام أزرق على خلفيه سودة
ومش قادر ابطل قرايه
وبعدين دكاترة علشان عيوني اللي باظت

Darweshe said...

غادة .. كلامك رقيق واحساسك مرهف دة جد مش مجاملة ... اما بعد انتى ذكرتى كتير عادات هى قريبة منى واحب اعيشها باستثناء كوباية عصير البرتقال المثلج فى عز الشتاء والتى استبدلها بفنجان القوة المضبوط .. وكدة .. البحر برضة انا بينتابنى نفس شعورك فى البدية بس بتغلب علية وبنزل ولما بنزل بخاف برضة اطلع لليابس .صباح التناقض . اما النخيل فهو احب الاشياء الى قلبى واحب ارسم النخل كتير بحس فيه بمزيج من الشموخ وحكمة الزمن معا
الا انت مش قولتيى انتى ساكنة فين المنطقة الجميلة اللى فيها شجر وورد ونخيل وزروع
.. وبعدين انا بأيد شغف
بس هوه نعتبر نفسنا - احم - معزومين عندك على شوربة وبعديها كوباية برتقال متلج ..وبعدها نستمتع زيك بمناظر الفيافى المجاورة ليكى ..
ومن هنا يجب ان نشن حملة دولية لجمع التوقيعات للعزومة - احم - عندك
ودمتم
بالمناسبة احب اغيظك انا حضرت حفلة لفيروز فى بيت الدين ببيروت فى اغسطس 2002 ...