Friday, September 19, 2008

بـــعــيــد خالــص



صغيرة
عشرين سنه وكام شهر
بتلضم من عنيها خيط لحد البحر
بتستنى تتهجي العالم زي ما بتتمنى
بتلقى العالم بيشكلها بلون غريب
في لون أخضر لازم يظهر
ولو مظهرش
مش هتعرف تعد سنين عمرها اللي جاي
صغيرة
عندها تلاتين سنة وكام يوم
بتشكل من الصلصال عرايس عريانة
وراقصات باليه نحاف ولونهم خمري
بتستنى القمر يوم أربعتاشر يكون هلال
بس دايما بيخونها وبيرجع دايرة
بتتخنق من الدواير المقفولة
عايزاه هلال علشان تقف على حافته الحادة
وترمى روحها فوق
عايزة تعلى للسما
تنتشي من غير نبيذ
تدوخ من الفرحه من غير دخان
تستنى كوباية الليمون الساقعه في عز البرد
وترمي نفسها في حضنك وانت نايم
صغيرة
عندها يدوب كام ساعة
دايما لما تتكلم تعمل نفسها جاهلة
علشان انت تفضل الأستاذ
وعلشان لما تقولها تعالي نرقص على صوت الكمان
تقوم وتطفي النور
وتتهجى حركات رجليها و دقات قلبها مع نفسك
صغيرة زي بحر كبير

وواسع قلبها زي سما
كل يوم جديدة زي موجة
بس انت مبتشوفهاش
نقط ...فيهم كلام مش لازم يتقال
مثلا
إنك تفضل وياها لحد الفجر
أو إنك ترسم على جسمها أحلامك
أو
تشرب من نفس الفنجان وياها
عبيطة
البنت اللي بتستنى صوت القطر الفجر
عارف ليه
علشان عمر ماكان جمب بيتهم قطر
بس دايما لما بيجي الفجر بتسمع صوت القطر
فبتفتكر البحر
ولون الشجر الغامق بتشوفه زاهي
صغيرة
عقل العيال اللي لسه نونو جواها
وقلب البنت اللي ممكن تبقى أمك جواها
بس انت شايفها بسذاجة الكبار
عمرك جربت تحاول انك تدخل جوة القلب النونو وتعرف إيه جواه؟
ولأنك لسه صغير
عمرك ماهتقدر
ده لأنك خايف
سمعتْ منير وفيروز وسعاد ماسي وحبتك
بتكره التراب لما يدخل عنيها فجأة علشان بيحوشك عنها
بتلتقيك دايماً في منامها
وبتكون متأكده إنك بالذات في الوقت ده
بتحلم بواحدة تانية

.................

الصورة ل
Rossy Topalova

11 comments:

vetrinary said...

ضحكه عنيها مش حقيقى
ضحكه عنيها
ضحكه عنين واحد صنم
العين ما تعرف غير البكا
عمرك سمعت
عن حد ودنه تبتسم
ضحكه عنيها مش حقيقى
ضحكه عنيها السراب
وانا وانتا ضالين الطريق
انا وانتا ف الصحرا الكلاب
اشرب يا حلو
مش قلت توهه تاخد دليلك م السحاب
وقلت لا للبحر لتموت غريق

Anonymous said...

جميل .. وهل تعتقدين بع أن نصل لما نريد أو بعد العيش حتى لو لحظات نتمناها..قد نجد الراحه !

أحمد الديب said...

لسه عم تحلم بالقمر؟
:)

Unknown said...

الله عليكي الله عليكي الله عليكي جدا
انامش متخصصة في اشعر
بس بجد كلامك عجبني عجبني اوي
كلام أنثوي بحت
كل اللي بتكتبيه فيه حتة من كل واحدة فينا
في حتة من دول شبهي على فكرة
:)
و شبه كل البنات
سعيدة اوي ان فضولي جابني عندك :)
هايقى زبونتك و استحمليني
:)

Hamed Ibrahim said...

بساطتها حلوة

وائل فتحي said...

غااااااده


كيفك


بس

Anonymous said...

أولا تحياتى
ثانيا أنا اسمى لبنى شكرى باحثة بالجامعة الأمريكية بالقاهرة أقوم بعمل دراسة عن المدونات المصريات من أجل الحصول على درجة الماجستير. و يسعدنى أن تكون مدونتك من ضمن المدونات التى يشملها البحث. . لذا أرجو أن ترسلى لى بريدك الالكترونى حتى اتمكن من إرسال الاستبان و طبيعة الدراسة إليك
رجاءا حارا مدة المشاركة مفتوحة من 19 إلى 24 أكتوبر
شكرا لتعاونك
lobnabona@yahoo.com

كلمة حق said...

أولا: أنا حزفت تعليك بدون قصد بدلا من ان أنشره
ثانيا:قبل أى شىْ هل أنت مسلمة أم لا حتى لا يكون كلامى هباءاً منثورا
ثالثا: كلمة اتقى الله تقال للتذكرة مهما بلغت درجة الايمان بدليل قول المرأة لسيدنا عمر ابن الخطاب اتقى الله يا عمر ولم ينكر عليها ذلك وبدليل قول الله عز وجل " يا أيها الذين أمنوا اتقوا الله " فلم يقل كفروا أو عصوا
رابعا: انا لم أقصد الا النصح فإن نشر مثل هذه الصور يغضب الله عز وجل فهل تقدرين على غضب الله
خامساً: غفر الله لكى ما قولتيه فى حقى من إساءة

غادة الكاميليا said...

vetrinary
مممممممممممم
ونروح للفاصل الاعلاني ونرجع


حامد
على الأقل من حقنا نعيش لظات نقول انها بتاعتنا

أحمد الديب
لسة

فانيليا
منورة يا شوشو

أحمد
ميرسي

وائل فتحي

فينك
بس
d:

Anonymous said...

من اهتدى فإنما يهتدى لنفسه ومن ضل فإنما يضل عليها"
اللهم إنى قد بلغت اللهم فأشهد

أحمد شوقى said...

مش قادر اقلك تعليق غير ان ديه تانى مرة اقراها وبجد استمتعت بيها جدا، تسلم ايدك