Saturday, February 03, 2007

والله زمان ياتيجان

أنا بصراحه ممتنه جدا ليكى ياكرانيش لدعوتك لي للرد على هذا التاج رغم
صغرة أصلى كنت عايزة أبحبح شويه عن نفسي وأنا مخنوقه الخنقه دى
بس ما علينا أنا انطلب منى عن طريق الآنسه كرانيش بإني أقول عن خمس
حاجت مفيش حد خالص يعرفهم عنى ، ماشي هقولهم ياستى وعلم وسينفذ يا
افندمه
أول حاجه أول حاجه
أيام زمان زماااااااااااااااان وأنا في أولى ابتدائي مكنش عندى أصحاب غير ابن
خالي وواحد جارنا هناك عند بيت جدتى المهم هما كانوا في فصلي أول سنه
وعرفت ولد زميلنا كان اسمه محمد كان طيب خالص كده زيي مبيكلمش حد
برده والمهم اتكلمنا سوا أصلى كنت بحب الناس الهاديين واتفقنا نزاكر يوم
عندى ويوم عنده بكل براءه والله وطبعا أول يوم رحناوباباه فضل يذاكرلنا
رجعت البيت طبعا متأخرة على المغرب كده ومن يومها مكلمتش محمد ده
تانى طبعا أكيد انتم عارفين بابا وماما كانم عاملين ازاى وبالذات بقى لما
لاقونى راجعه وبقولهم كنت بذاكر مع محمد زميلي
2
لما اتنقلت تانيه ابتدائي مكنتش بكلم حد بقى خالص بس في بنت قررت
تصاحبنى وندهتلى
اسمك ايه :غادة
وأنا هند
ازيك ياهند
تيجي تلعبي معانا ياغاده
مقلكوش بقى كنت مزقططه قوى وطايرة من الفرحه
أنا: هتلعبوا ايه. بعد معرفتنى بالشله الجامده بتاعتها هى وأختها طبعا
هي :هنلعب حجله(الأولى) هتبقي في الفريق بتاعى
أنا بكل ازبهلال وتساؤل وطيبه وعفويه :يعنى إيه حجله(أولى) يعنى ايه؟؟
سيل من الضحكات والنكات على البنت اللي متعرفش تلعب
هما مكنوش يعرفوا ان آخري ألعب أم وعروسه بالعروسه اللي شعرها أصفر
وأنا أمها
3
لماسافرنا اسكندريه وأنا في خامسه ابتدائي نزلنا في فندق حلو أوى وطبعا
لأنى عيلةزمان يعنى قالولى مينفعش تنزلى البحرفانزلى حمام السباحةكفايه
كنت متنكده بس على مين قررت إنى أنزل حمام السباحه الكبير وطلع كبير
فعلا وكنت هغرق للأسف وعرفت من يومهاإنى بغرق في شبر ميه المهم بعد
ماعرفت وطلعت بعد خبطه جامده في السلم الحديد بتاع حمام السباحه بابالقطنى
صورة لما شوفت الصورة لقيتنى بضحك معرفش ازاى ومحدش يعرف لحد
النهارده إنى كنت أغرق أغرق أغرق
4
من وأنا صغيرة عمري ما اتمنيت أكون دكتورة ولا مهندسه دايما كنت بحلم
أكون صحفيه أوكاتبه كبيرة المهم أبقى بكتب على فكرة أنا كنت شاطرة جدا
والمدرسين بتوعى من أيام ابتدائي لحد آخر ثانويه عامه فاكرنى جدا ولما
بيقابلونى بيرمولي سلام شحط محط
5
أنا بحب التمثيل جديده دى مش كده؟؟ وبحب الغنى ونفسي أمثل بجد بجد
يعنى ومحدش
يتريق بس التمثيل أوالغنى مش حلمى خااااالص عارفين لما كنت بفكرألعب
لوحدى كنت بلعب إيه بلبس الجيبه الغامقه بتاعتى كانت فوق الركبه وواسعه
وأعمل زي راقصات الباليه كنت بحفظ الحركات كويس وأأديها لوحدى وده
برده كان أيام ابتدائي وأولى اعدادى بعدها تم عدم هذه الجيبه الجميله وجعلها
ممسحة مطبخ تقريبا
...............................
هوامش بقى برده محدش يعرفها وتعتبر من أهمتفاصيل عمري
مرة بابا كان دخل قوضتى يصحينى وبعدين بيقول ايه القمر ده أول مرة تبقى
حلوة كده قلتله برده مش هصحي قالي لأ صحيح انتى عنيكى صافيه أوى
ووشك بيلمع لمعه جميله قمت جريت على المرايه والله كان عنده حق مش
انى حلوةعلشان بس مفتريش وقول إنى حلوة لأ عيني فعلا كانت صافيه أوى
وأنا عمري ما أخدت بالي ووشي كان بيلمع لمعه جميله من يومها وأنا حاطه
المرايه على الكرسي اللي جمب سريري وكل يوم الصبح أشوف عيني صافيه
ولا لأ ولما تبقى صافيه أوى ببقى مبسوطه جدا
...............
زمان كنت دايما عندخالتى الكبيرةلأن ماماكانت دايما في المستشفى مع أخوية
الصغير ولحد فترة قريبه الناس اللي كانوابيشوفونى كتيرمع بنت خالتى كانوا
فاكرنى بنت بنت خالتى
.......................................
لما الدنيا بتمطر جامد بطلع فوق السطح من وراماماعلشان متزعقليش أحسن
أبرد وأقف بقى في المطرة لحد مقول يابس وبدعي ربنا من جوايا اوى
..............................................
هما كده خمسه صح؟
يلا امرر التاج لمين

19 comments:

كائن العزلة الكئيب said...

سعيد جدا بكم الصراحة اللى طب عليكم كده مرة واحدة أنت و الست كرانيش و الله أعلم مين تانى بس أنا مبسوط علشان بعرفكم أكتر و عشان انا اول واحد يعلق

مصطفى حسان said...

تعرفي ان الصراحة بتاعتك حلوة قوي .. يعني انا دايما كنت مقتنع ان تملى سقف الصراحة أعلى مننا بكتير .. واحنا ما نقدرش نعدي السقف ده .. بس بجد انتي تقريبا غيرتي لي وجهة النظر دي وصدقت ان في ناس بتحكي بجد
طبعا مش معنى ده ان هي دي الصراحة الكاملة
أكيد برضه لسه في كمية صراحة مختفية مش من عندك بس .. لكن من عندنا كلنا

الوردة السوداء said...

هو ليه ياغادة كل حكاويكى وانتى صغيرة كدة
كنا عايزين نعرف عنك حاجة وانتى كبيرة

سلامـــــــــــــه said...

تصدقي انك لسه صافيه لحد دلوقتي
!!؟
.............
عزيزتي
دمتي بود

Memo said...

ايه يابنني ده
ليه الفضايح دي بس
وبعدين الدنيا وقفت عند ابتدائي مفيش اعدادي مفيش سنوي مفيش جامعه الله يخرب بيت التعليم الي ضيع الذكريات الحلوه
تحياتشي

بلال حســــنى said...

حلو اوى انك تحبي تصحى الصبح على عيونك
بجد فكرة انك تحبي عيونك صافيه
فيها روقان لا
وذاتيه منك ليكى

3aziz 3eni said...

علشان كدة انت جميلة وصافية
المطر دة معناه ان الانسان بيحب الخير والناس
بسيطة جدا وواضح ان كنت خجولة دة كان ايام ابتدائى (مش عارف دلوقت) يمكن عنيك الصافية هى السبب طبعا ماحدش قدك
حلوة

syzef said...

ايه موضوع التلج الجامد ده..بس بجد جميل بيفكرني باغاني الشتاء وكانغ اللي الكائن ما يعرفوش

البوست بقي لذيذ وممتع وفي صراحه الي حد ما بس انتو هتشوفو الصراحه اللي بجد عندي بقي

وشيبك م الورده السوده اللي مش عاجبها حكاوي زمان ...هو في احلي من حكاوي العيال

Anonymous said...

أنا أحسدك
أنا أحسدك
أنا
أ
ح
س
د
ك

بياترتس said...

شكرا ياستى عالتاج

يمامة said...

بس خلى بالك من المرايه اللى جنب السرير لحد يخبط فيها ولا حاجه

عين ضيقة said...

حلو التاج وحلوة عنيكى..خصوصا وانت بتعيطى
ههههههههه
بتفكرينى بأيام مش راضية ترجع
عموما بالتوفيق

21arestoo said...

يخرب عقلك
انتي ما صدقتي ولا ايه؟
يا دوب البنية قالتلك اعملي تاج
رحتي كاتبة كل حاجة
هههههههههههههههه

لا بس بجد تمام يعني

rokaaa said...

هااااااااااااااااااى
ازيك يا غاده , عامله ايه يا رب تكونى بخير
على فكره انتى بجد من الناس اللى انا بحب تعليقاتهم جدا
عجبنى جدا الخمس حاجات
وانا مع الورده السودا فى الراى ما فيش حاجه عنك وانتى كبيره
روكى

إنسان || Human said...

بجد ياغادة أستمتعت جداو أنا بقرا ذكرياتك ...وماشاء الله فاكره حاجات كتير من وانتي صغيرة

غادة الكاميليا said...

سعيد جدا ولا كائن العزله

يلا بس علشان تعرفوا اننا مش غامضات

درش
يا سيدي أخجلت تواضعي بجد ولو التاج كبير شويه والله كنت بحبحت أصلي نفسي أصرخ شويه

الوردة السودة
هوشوشك لما أشوفك وأقولك حكاويّ وأنا كبيرة


سلاااااااااااااااااامه
ربنا يخليك بس ياريت أفضل كده

ميمو
بذمتك مش برده حكاوى عيالي
منورانى

بيبو
دى بارانويا يا ابنى

سكومنس
ربنا يخليك يارافع معنوياتى

سيزيف
انا بقول كده بردوا
صباحك اون سو وجون سو اصل الخريف قرب

الزرافه
ربنا يجعل بيت المحسنين عمار

بياترتس
الله يشكرك يا جمرة أشوفك وانتى منورة

يمامه
لأ مهو أنا عامله حسابي في مراية تانيه تحت مخدتى

عين ضيقه
اه حلوة ...هى مين دى اللي حلوة سوءوا سمعتى بقى

أريسطوا
ياراجل انت فاكر ان ده كل حاجه
ده انت طيب طيابه

روكى
ميرسي ربنا يخليك بس فينك ليك وحشه والله

غادة الكاميليا said...

human
ربنا يخليك ده من زوقك
بس عجبتك حاجاتى يعنى أنا عندى كتير انت تأمر

عاشقة الوطن said...

ياغادة الكاميليا
ايه الحاجات الحلوة اللى عنك ديه

بس واضح ان شخصيتك لذيذة جدااااا

غادة الكاميليا said...

عاشقة الوطن
ميرسي ربنا يخليكى ده أكيد من زوقك