Sunday, August 20, 2006

تاج 3

أعتذر عن هذا التأخير والانقطاع التدويني ربما لظروف نفسيه أو عدم قدرة
على الكتابه والاستمرار في الموت البطئ ، ما علينا ....جالي دعوات كتير
إني أرد على التاج الآتي من الفلاح هوميروس و بعدك على بالي و
كورتكس وماخفي كان أعظم ، المهم نجاوب بقى
هل انت راض عن مدونتك شكلا وموضوعا؟
شكلاً راضيه جدا اللون بيعكس نفسيتي .. أما موضوعاً فبجد نفسي أغير شويه
هل تعلم اسرتك الصغيرة بأمر مدونتك؟
تعلم من أول يوم عملتها فيه مع أني مش أنا اللي عملتها في الأول بس محدش فكر
يدخلها خالص هما آخرهم موقع عمروخالد
هل تجد حرجا في ان تخبر صديقا عن مدونتك ؟
لأ خالص
هل تعتبرها امرا خاص؟
أيوة جدا بمعنى أوضح مبقاش لي مكان أفضفض فيه غيرها
هل تسبب المدونات بتغير ايجابي لافكارك؟اعطني مثال ف حالة نعم
نعم ومن غير أمثله وحياتكم
هل تكتفي بفتح صفحات من يعقبوك بردود ف مدونتك ام تسع لاكتشاف المزيد؟
إكتشاف المزيد دي هوايه عندي بحس بنشوة عجيبه لما ألاقي مدونه حلوة
ماذا يعني لك عدد الزوار ...هل تهتم بوضعه؟
معنديش ولسه مفكرتش أنزله بصراحه
هل حاولت تخيل شكل اصدقائك المدونين؟
لأ ولا مرة بس أكيد بشر
هل ترى فائدة حقيقية للتدوين:؟
آه بيخرجني من حالة الاكتئاب اللي بتدخلني كتير وبخرج فيه
برده شحنة الفرح اللي أحياناً بتجيلي كده منين معرفش
هل تشعر ان مجتمع المدونين مجتمع منفصل عن العالم المحيط بك ام
متفاعل مع احداثه؟
منفصل بكل جماله ومتصل مع أفكارة إزاي معرفش بس هو عالم تاني
هل يزعجك وجود نقد ف مدونتك ام تعتبره ظاهرة صحية؟
بالعكس أنا بحب الانتقادات ، أهو ياعم أرسطو براحتك خالص
تخاف من بعض المدونات السياسية وتتحاشها؟ هل صدمك
اعتقال بعض المدونين؟
لأ مبخافش بالعكس بدأت أواظب عليها وزعلت لما أعتقلوا المدونين
وبصراحه أتمنيت أكون واحده منهم
هل فكرت بمصير مدونتك حال وفاتك؟
لأ بصراحه بس على العموم أنا مظبطاها في حالة الوفاه جو كئيب
وخلفية سوده وأغاني تخليك تعيط على روحك يعني مش قلقانه
آخر سؤال : تحب تسمع أغنية إيه- بلاش صيغة آمال فهمى دى -
ما الاغنية التى تحب وضع اللينك الخاص بها فى مدونتك؟
أغنية محمد منير شجر الليمون
وأخيراً أمرر التاج لكل من
كليوباترا
عوليس
سيزيف
زرياب
عز

15 comments:

syzef said...

لي الشرف اني اكون اول واحد اعلق
اولا شكرا علي امرارك االتاج ليّ ....الا ايه هو التاج ده ياغاده مش قضيتنا
المهم البوست في اراء لذيذه ومقنعه لحد ما ..بس اللي انا ملاحظه نظرة التشاؤم اللي بدات تتسلل لنفس الطفلة التي تغني اغنيات الطفل في يوم المطر وده اللي بعترض عليه بشده
اخيرا ...دمت لنا طفلتنا البريه وابتسامتنا المفقوده

Anonymous said...

أجاباتك مقنعه وتعكس عن شخصيه مكتئبه الا حد ما ما تحولى تغيرى وتفكى عن نفسك شويه بلاش تكتئبى بالطريقه دى
تحياتى لأجاباتك

karakib said...

غاده الكاميليا ...
ليه ؟؟ ليه بداتي تكتئبي كده ؟
اتمني ان تكوني بخير ...
انتوك

Ezz said...

والله زمان يا غادة، الواد كل يوم بيسألني عن خطيبته و أنا بصبر فيه و أقوله حماتك شكلها طنشت ... أزيك وحشتيني بجد. اللي فات ده كان أولا، ثانيا، شكرا طبعا على تمريرك لتاج التدوينة و عقبال تاج العرش بايخة ما علينا بس عموما شكرا لأنك و ضعتيني مع كوكبة من أقمار التدوين سيزيف، و عوليس و زرياب وكليوبترا و يجعله عامر وسيبك من الجو الكئيب ده على فكرة الصيف بيعمل كده ساعات و على فكره برضه الشتا و المطر و الجلوس خلف الشباك و الدنيا بترخ و اليد تحمل "مج" شاي تقيل بالنعناع بيغيروا المود تخيلي الموقف ده و صديقيني مودك راح يتغير. عز

بعدك على بالى said...

السواد لونى المفضل.....

ياااااااااه ياغادة ،وجعتنى جملتك دى قوى، ايه يابنتى ليه ؟؟
ولما انتى الكائن الرائع شديد الدفء والانسانية ، البرىء زى طفل لسه مولود، القلب الى ميعرفش غير الحب والخير والود لكل الناس ..الايد الى دايما تطبطب وتمسح دموعنا والحضن اللى بيحتوى همومنا ..و .. حاجات كتير كلنا لمسناها فيكى ..لما انتى يهزمك الاكتئاب .. يبقى فى حاجة غلط ...ليه موجوعة كده ... اكتبى ياغادة ..طلعى كل اللى جواكى... اصرخى.. اتمردى بس اوعى تتهزمى ...
بحبك وبقولها بصوت عالى

غادة الكاميليا said...

سيزيف
العفو أي خدمه
طفله بريئه ؟ وابتسامه مفقوده ؟
الطفله تقريبا سافرت ومرجعتش أو مش هترجع المطر وحشني أوي وحشني بجد نفسي الشتا يرجع الصيف خنقني
وعد العيون
مكتئبه ومعقده وهموت قريب بس مش بإيدي والله كله مكتوب
أنتوك
فينك من زمان بخير يا أخي
عز
أنا بخير على الآخر وبعدين ابنك ده وحشني جدا ابعتله سلامي بس ادعي الشتا ييجي وأنا لسه موجوده وكوباية الشاي بالنعناع يااااااااااااه وحشني البرد
بعدك على بالي
وحشتيني مبقاش لي مكان تاني غير هنا أقدر أصرخ فيه
أنا كمان بحبك جداااااااااااا

هوميروس said...

مساء الخير عمرو خالد ليه بس كده
ما علينا
حلوة حكاية الجو الكئيب دي

كلبوزة لكن سمباتيك said...

الحزن سحابة
تاتي و تغيب
اتمني ان تكون سحابتك الحزينة قد انقشعت
و اشرقت من جديد شمس سعادتك
حتوحشيني
قبلاتي

مأمون المغازي said...

الغالية / غادة

تحياتي
ربما غبت عنكم لكني أعود لأبحث عنكم وأبحث عني بينك

مررت لكِ التاج في حين لم أعلم أن الأعزاء سبقوني

في انتظار الجديد لأننا ربما غبنا معًا وعدنا مًا

تقديري

21arestoo said...

اهو يا عم ارسطو
؟؟؟؟؟

طيب انا بقى جاي اقطع الدنيا

لا بجد اجاباتك عجبتني جدا

خصوصا
السؤال قبل الاخير

Anonymous said...

هييييييييييييييه
عادت lovely Ghada :D

عود احمد
:)

ماشي يا عم علي الاجوبة السكر يا سكر
بس هما المدونين بشر؟ دول ملايكة
:))))

Mamdouh Dorrah said...

غادة
روحك الجميلة لسه موجودة
بس اراها زادت جمالا
فياتري اية السبب؟؟؟
انا عارف

... said...

نورتى من تانى

معلش على التأخير

على فكرة اجاباتك هنا جميلة ورقيقة زيك

نورتى يا جميلة

أُكتب بالرصاص said...

إجابات حلوة
بس ليه مختصر اختصارا مخلا!؟

أُكتب بالرصاص said...

كمان عايز اقول
احسنت اختيار الالوان

مريحة للعين
الازرق على السود

واو
رائع